ஜோதி

அவர் மூன்றாம் முத்திரையை உடைத்தபோது, மூன்றாம் ஜீவனானது: நீ வந்துபார் என்று சொல்லக்கேட்டேன். நான் பார்த்தபோது, இதோ, ஒரு கறுப்புக்குதிரையைக் கண்டேன்; அதின்மேல் ஏறியிருந்தவன் ஒரு தராசைத் தன் கையிலே பிடித்திருந்தான். அப்பொழுது, ஒரு பணத்துக்கு ஒருபடி கோதுமையென்றும், ஒரு பணத்துக்கு மூன்றுபடி வாற்கோதுமையென்றும், எண்ணெயையும் திராட்சரசத்தையும் சேதப்படுத்தாதே என்றும், நான்கு ஜீவன்களின் மத்தியிலிருந்து உண்டான சத்தத்தைக் கேட்டேன். அவர் நாலாம் முத்திரையை உடைத்தபோது, நாலாம் ஜீவனானது: நீ வந்துபார் என்று சொல்லுஞ் சத்தத்தைக் கேட்டேன். நான் பார்த்தபோது, இதோ, மங்கினநிறமுள்ள ஒரு குதிரையைக் கண்டேன்; அதின்மேல் ஏறியிருந்தவனுக்கு மரணம் என்று பெயர்; பாதாளம் அவன்பின் சென்றது. பட்டயத்தினாலும், பஞ்சத்தினாலும், சாவினாலும், பூமியின் துஷ்டமிருகங்களினாலும், பூமியின் காற்பங்கிலுள்ளவர்களைக் கொலைசெய்யும்படியான அதிகாரம் அவைகளுக்குக் கொடுக்கப்பட்டது.(வெளி 6:5-8)

முதல் மூன்று குதிரைகள் ஆவிக்குரிய விதத்திலே விசுவாசிகளின் விசுவாசத்தை குலைத்துப்போடக் கூடியவைகள். கடைசியாக வரும் மங்கின குதிரை கறுப்பு, வெள்ளை மற்றும் சிவப்பு நிறங்களின் ஆவியின் கலவையாக உள்ளது. இது ஆவிக்குரிய விதத்தில் மாத்திரம் தீங்கு விளைவிக்காமல் சரீரப்பிரகாரமாகவும் தீங்கு விளைவிக்க கூடியது. இங்கே பூமியின் துஷ்டமிருகங்களினாலும் என்று சொல்லும் போது அது கோவிட் போன்ற கண்ணுக்குத் தெரியாத துஷ்டமிருகமாகவும் இருக்கலாம். கோவிட் போன்ற கிருமிகள், மனுஷனுடைய பேராசையினாலும், உயிரியல் ஆயுத ஆராய்ச்சியினால் வெளிப்பட கூடும்.

ஆகவே நாம் ஒரு முக்கியமான கேள்வியைக் கேட்க வேண்டும்: தேவனுடைய அன்பிலிருந்து நம்மை யாரால் பிரிக்க முடியும்? பவுல் ரோமர் 8:38-39ல் எழுதுகிறார், “மரணமானாலும், ஜீவனானாலும், தேவதூதர்களானாலும், அதிகாரங்களானாலும், வல்லமைகளானாலும், நிகழ்காரியங்களானாலும், வருங்காரியங்களானாலும், உயர்வானாலும், தாழ்வானாலும், வேறெந்தச் சிருஷ்டியானாலும் நம்முடைய கர்த்தராகிய கிறிஸ்து இயேசுவிலுள்ள தேவனுடைய அன்பைவிட்டு நம்மைப் பிரிக்கமாட்டாதென்று நிச்சயித்திருக்கிறேன்.” அப்படியானால், தேவதூதர்கள் கூட நம்மை கிறிஸ்துவின் அன்பை விட்டு பிரிக்க முடியாது. பிசாசும் கூட விழுந்து போன ஒரு தேவதூதன் தான். அவனும், அவனுடைய சேனையும் கூட நம்மை தேவனுடைய இரட்சிப்பின் அன்பை விட்டு பிரிக்க முடியாது.

அப்படி இருந்தும், 1 தீமோத்தேயு 4:1ல், பவுல் அப்போஸ்தலர் இவ்வாறு கூறுகிறார்: “ஆகிலும், ஆவியானவர் வெளிப்படையாய்ச் சொல்லுகிறபடி, பிற்காலங்களிலே மனச்சாட்சியில் சூடுண்ட பொய்யருடைய மாயத்தினாலே சிலர் வஞ்சிக்கிற ஆவிகளுக்கும் பிசாசுகளின் உபதேசங்களுக்கும் செவிகொடுத்து, விசுவாசத்தை விட்டு விலகிப்போவார்கள்.” மேலும் எபிரெயர் 9:14 சொல்லுகிறது என்னவென்றால்: “நித்திய ஆவியினாலே தம்மைத்தாமே பழுதற்ற பலியாகத் தேவனுக்கு ஒப்புக்கொடுத்த கிறிஸ்துவினுடைய இரத்தம் ஜீவனுள்ள தேவனுக்கு ஊழியஞ்செய்வதற்கு உங்கள் மனச்சாட்சியைச் செத்தக்கிரியைகளறச் சுத்திகரிப்பது எவ்வளவு நிச்சயம்!” அப்படியானால், கிறிஸ்துவின் இரத்தம் நமது மனசாட்சியை செத்த கிரியைகளிலிருந்து சுத்திகரிக்கிறது. ஆனால், நாம் விசுவாசத்தை விட்டு விலகி, வஞ்சக ஆவிகளுக்கும், பொய்ப் போதனைகளுக்கும் செவிகொடுத்தால், நமது மனசாட்சி கடினப்பட்டு, கர்த்தருடைய அன்பிலிருந்து நம்மை விலக்கக் கூடும். ஆகவே, தேவனுடைய அன்பிலிருந்து நம்மைப் பிரிக்க நம்மால் மாத்திரமே முடியும் என்று நாம் அறிந்துகொள்ள வேண்டும்.

கர்த்தர் தமது பரிசுத்த ஆவியின் மூலமாக நமக்கு சொல்வது என்னவென்றால், இந்தக் குதிரைகளின் ஆவிகள் நம்மை போன்ற விசுவாசிகளின் இருதயத்தையும் மாற்றலாம். ஆதலால் நாம் ஜாக்கிரதை உள்ளவர்களாக, நம்முடைய பரிசுத்ததையும், விசுவாசத்தையும் காத்துக்கொள்ள வேண்டும்.

இதிலிருந்து நாம் அறிவது என்னவென்றால், நாம் ஜாக்கிரதையாய் இராவிட்டால் நாம் வெள்ளைக் குதிரையில் இருந்து வருகிறதும், கிறிஸ்துவுக்கு விரோதமாய் கிரியை செய்கிறதுமான மாயமான தேவபக்தியில் மாட்டிக்கொள்ள வாய்ப்பு உண்டு. அதே போல உலகத்தையும் அதின் பெருமைகளையும் பற்றிக் கொண்டு சக மனிதர்களின் மீது வெறுப்பை ஏற்படுத்தும் சிவப்பு குதிரையின் ஆவியினால் பாதிக்கப்படவும் வாய்ப்பு உண்டு. மேலும் நாம் எல்லா சக மனுஷர்களோடு மெய் அன்பான உறவு கொள்ளாமல் எல்லா உறவுகளையும் கொடுக்கல் வாங்கலாக மாற்றக் கூடிய கறுப்புக் குதிரையின் ஆவியினாலும் பாதிக்கப்படலாம். இப்படிப்பட்ட ஆவிகளின் சூழ்ச்சியில் இருந்து நாம் தப்பித்துக்கொள்ள நம் ஆண்டவராகிய இயேசு சில ஆலோசனைகளைக் கொடுத்திருக்கிறார். அந்த ஆலோசனைகளின் சில வசனங்களை நாம் இங்கே பார்க்கலாம்.

வெளிப்படுத்தல் 12:10-11 , இப்படி சொல்லுகிறது; “அப்பொழுது வானத்திலே ஒரு பெரிய சத்தமுண்டாகி: இப்பொழுது இரட்சிப்பும் வல்லமையும் நமது தேவனுடைய ராஜ்யமும், அவருடைய கிறிஸ்துவின் அதிகாரமும் உண்டாயிருக்கிறது; இரவும் பகலும் நம்முடைய தேவனுக்குமுன்பாக நம்முடைய சகோதரர்மேல் குற்றஞ் சுமத்தும்பொருட்டு அவர்கள் மேல் குற்றஞ்சாட்டுகிறவன் தாழத் தள்ளப்பட்டுப்போனான். மரணம் நேரிடுகிறதாயிருந்தாலும் அதற்குத் தப்பும்படி தங்கள் ஜீவனையும் பாராமல், ஆட்டுக்குட்டியின் இரத்தத்தினாலும் தங்கள் சாட்சியின் வசனத்தினாலும் அவனை ஜெயித்தார்கள்.” இதைப் படித்தால் நமக்கு ஆச்சரியமாய் இருக்கலாம். ஆனால் நாம் மெய்யான ஜீவனைப் பெற்றுக்கொள்ள வேண்டுமானால் இந்த உலகப் பிரகாரமான ஜீவனை வெறுத்துத் தள்ள வேண்டும். இந்த உலகத்திலே நம் ஜீவனை இயேசுவின் கரத்திலே முழுமையாக ஒப்புக்கொடுக்கும் போது, அவர் நமக்கு நித்தியத்திற்கு ஏதுவான மெய் ஜீவனைக் கொடுப்பார். நீங்கள் வெளிப்படுத்தின புஸ்தகத்தில் 6:9-11ஐ படித்தீர்களானால் ஆனேக பரிசுத்தவான்கள் இந்த குதிரைகளின் ஆவிகளை எதிர்த்து நின்றதினால் தங்கள் ஜீவனையும் இழந்து, தேவனுடைய ஆலயத்தின் பலிபீடத்திலே காணப்படுகிறார்கள். அவர்களுக்கு இளைப்பாறுதல் கொடுக்கவே ஆட்டுக்குட்டியானவர் 5வது முத்திரையை உடைக்கிறார்.

இப்படிப்பட்ட கொடூரமான குதிரைகள் ஒன்றின் பின் ஒன்றாக ஏன் இந்த உலகத்தை ஆட்கொள்ள வேண்டும்? நீங்கள் லேவியராகமம்14:39வது வசனத்தில் இருந்து கடைசிவரை படித்தீர்களானால் தேவன் தம்முடைய ஜனங்கள் கீழ்படியாமல் போகும் போது படிப்படியாக உபத்திரவங்களை கொடுப்பார் என்று சொல்லியிருக்கிறார். இந்த ஜனங்கள் அப்படியாவது மனந்திரும்புவார்கள் என்று எதிர்பார்க்கிறார். இதனால் தான் நமக்கு உபத்திரவங்கள் மிகுதியாகும் போது நாம் நம்மை நாமே பரிசோதித்து நம் தவறுகளை உணர்ந்து அவைகளை அறிக்கை செய்து மனந்திரும்பி கர்த்தரை தேட வேண்டும். அப்பொழுது கர்த்தர் நம்மை இந்த குதிரைகளின் ஆதிக்கத்திலிருந்து விடுவிப்பார்.

1 கொரிந்தியர் 11:31-32 இப்படி சொல்கிறது; “நம்மை நாமே நிதானித்து அறிந்தால் நாம் நியாயந்தீர்க்கப்படோம். நாம் நியாயந்தீர்க்கப்படும்போது உலகத்தோடே ஆக்கினைக்குள்ளாகத் தீர்க்கப்படாதபடிக்கு, கர்த்தராலே சிட்சிக்கப்படுகிறோம்.” இந்த வசனங்கள் கர்த்தருடைய பந்தியிலே நாம் சேரும்போது பரிசுத்தமாக்கப்பட வேண்டும் என்பதற்காக எழுதப்பட்டு இருக்கிறது. ஆதலால் சகோதர, சகோதரிகளே கர்த்தர் நம்மை தம்முடைய அன்பினாலும், இரக்கத்தினாலேயுமே சிட்சிக்கிறார் என்று அறிந்து கொள்ளுங்கள். நாம் மனந்திரும்பாத பட்சத்தில் அவர் தம்முடைய சிட்சையை அதிகரிப்பார். இது தான் அவருடைய அன்பு. அந்த அன்பை நாம் புரிந்துக் கொண்டு, மனந்திரும்பி, நம்முடைய வழிகளை நாம் சீர்ப்படுத்தினால், அவருடைய அரவணைப்பின் ஆசிர்வாதத்தையும் சீக்கிரத்தில் பெற்றுக் கொள்வோம்.